´´ කෝ මචං තාම නෑනේ... `` ක්ෂතිජ ගයාන්ට කිව්වේ ඉවසගෙන ඉදන් බැරිම තැන.
´´ පියල් සර් වේලාවට එයි බං... `` ගයාන් ඇඟට පතට නොදැනෙන්න කිව්වා.
´´ පියල් කාරයා නෙවෙයි යකෝ... සයුරි තාම නෑනේ....`` ක්ෂිතිජ කිව්වේ ගයාන්ගේ ඉණට අතින් අනින ගමන්.
´´ හහ් හා හා.. ඉවසපං පපුව ඉවසපං.. උඹේ සිහින කුමාරි.. වේලාවට වඩීවී.... ``
´´ අනේ පලයං.. යන්න.. ``
සයුරි කෙසේ වෙතත් තඩි චරිත් නම් ඈත එනවා ක්ෂිතිජ දැක්කා.
´´ මංගලම් ජය මංගලම්... වේවා.. ක්ෂිතිජට මංගලම්.. `` චරිත් පංතියට ගොඩ උනේ එහෙම කියාගෙන.
මූට මොන දිව්‍ය ඥාණය තියෙනවද දන්නෙ නෑ. ඉවෙන් වගේ ඔක්කෝම දැනෙන්න... ක්ෂිතිජ තමන්ටම කියා ගත්තා.
´´ ෂික්.. යකෝ කෑගහන්න එපා.. අනිත් කෙල්ලොන්ට ඇහුණොත් මෙතැනම හනිමුන් ඩ්‍රීම් එක සුන් කර ගන්න වෙනවා..``
සයුරි ලක්ෂිකා එක්ක බර කථාවක් දා ගෙන පංතිය පැත්තට ආවා.
´´ බලන් ඉන්නෙ නැතුව ගුඩ් මෝනිනං කියපං ``
ගයාන් යාලුවාට පොඩි ගයිඩ් එකක් දුන්නා.
´´ වැඩේ නෝන්ඩි වෙයිද ? ``
´´ කියලා බලපං කෝ...``
දැන් කට්ටිය ළග ළගම එනවා. ක්ෂිතිජ ගොඩට ගත්ත මාලුවා වගේ ගැහෙන්න පටන් අරන්.
´´ මොකෝ බං ගැහැන්නේ... මෙතැන කොල්ලා උඹ කියලා අමතක කරන්න එපා.. `` ගයාන් ක්ෂිතිජගේ කණට කෙඳුරුවා.
´´ ගුඩ්.... මෝනිං...... ``
´´ හායි ගුඩ් මෝනිං... දෙන්නටම... `` උත්තර දුන්නේ ලක්ෂිකා.
´´ මොකද අද දෙන්නා පරක්කු... `` ගයානුත් කථාවට සෙට් උණා.
´´ අනේ අද තාත්තා ආවේ නෑනේ.. ඉතිං මං සයුරිට අපේ ගෙදරට එන්න කිව්වා.. `` ලක්ෂිකා හිනා වෙවී ගයාන්ට උත්තර දුන්නා.
´´ හෙට විභාගෙට ලෑස්තිද ? `` ගයානුත් අරින්නෙ නෑ.
´´ දහම් පාසල් විභාගෙද ? ``
´´ ඔව්.. පාඩම් කලාද ? ``
´´ පාඩම් නං කලා.. ඒ වුණාට ෆිට් නෑ... ``
´´ හා. කියන්න අමතක උනා... ඔය දෙන්න කැමැති නං අලුත් විද්‍යාව පංතියක් තියෙනවා... එන්න මාරෙට උගන්නනවා... `` ක්ෂිතිජ කිව්වේ සයුරි දිහා බලන ගමන්.
´´ කොහෙද තියෙන්නෙ.. `` සයුරි ඇහුවේ ලක්ෂිකා ගේ මුහුණ දිහා බලාගෙන.
´´ අනේ මාත් විද්‍යාව පංතියක් හොය හොයා හිටියේ...`` ලක්ෂිකාත් උත්තර දුන්නා.
´´ මටත් විද්‍යාව නං අමාරුයි..`` සයුරි කිව්වේ පොඩි එකෙක් කියනවා වගේ.
දෙන දෙයියො ගෙදරටම ගෙනත් දෙනවලු... ක්ෂිතිජ එක පාරටම අහස දිහා බලාගෙන හිතින්ම ´´ තෑන්ක්ස් ගෝඩ් `` කිව්වා.
´´ පංතිය තියෙන්නෙ නං මේ ළග... පහළ ඩික්සන් රෝඩ් එකේ... උගන්නන්නේ ඕල්කට් එකේ.. මිස් කෙනෙක්... සිරාවට උගන්වනවා... `` ක්ෂිතිජ කියාගෙන කියාගෙන යනවා.
´´ ඇයි සිරාවට විතරද උගන්වන්නේ ධමණියට උගන්නන්නෙ නැද්ද `` ලක්ෂිකා අහපු විදිහට සයුරිට හොදටම හිනා.
´´ නෑ.. එහෙම එකක් නෑ.. හැබැයි.. ගාණ දෙසිය පණහයි... `` ක්ෂිතිජ නෝන්ඩිය මැඩගෙනම කිව්වා.
´´ අපෝ ගාන වැඩියි නේ.. ඒ ලෙවල් ක්ලාස් වල ගණන්නේ... `` සයුරි කිව්ව කථාවට වැඩිපුර කලබල උනේ ක්ෂිතිජ.
´´ ඒ උනාට මාරෙට උගන්වනවා.. එක දවසක් ඇවිත් බලන්න... රුපියල් දෙසිය පණහ පාඩු නෑ.. කියලා හිතෙයි... `` ගයාන් පටස් ගාලා කිව්වේ යාලුවා මේ පාර ඇණ ගන්න හින්දයි.
´´ හරි හරි අපි එන්නම් නේද සයුරි... බායි.... `` ලක්ෂිකා සයුරිවත් ඇදගෙන පංතිය ඇතුළට ගියා.
´´ අම්මෝ... එළොව ගිහින් මෙලොව ආවා වගේ.. මාර කටවල් දෙකක්නෙ බං... ``
´´ ඔව් බං.. ලක්ෂිකා පංසලේදීවත් ඔච්චර මාත් එක්ක කථා කර කර ඉදලා නෑ... වෙනදට තාත්තා පස්සෙන්මයි නේ...
´´ ඔන්න උඹටත් මම හින්ද චාන්ස් එක.. ඒක නෙවෙයි බං.. මුන් දෙන්න පංතියට ඒවිද ``
´´ ෂුවර් එනවා.... ``
´´ උඹ ෂුවර් කරලා කියන්නෙ කොහොමද ... `` ක්ෂිතිජ ඇහුවේ හිතේ තියෙන දෙගිඩියාව නැති කර ගන්න.
´´ මේකනේ මචං... වැරදිලාවත් උන් නාවොත් රුපියල් දෙසිය පණහ නිසා නාවා කියලා අපි හිතයි කියලා උන් හිතනවා... එහෙම නෝන්ඩි වෙන්න කෙල්ලො කැමැති නෑ බං... ``
´´ ආ.. උඹ නං එළ කොල්ලෙක් නේ... කොහොමද බං ගෑණුන්ගේ හිත් ගැන ඔච්චර හොදට දන්නේ.. ``
´´ යකෝ අපේ ගෙදරත් අක්කලා තුන් දෙනෙක්ම ඉන්නවනේ.. උන් හැරෙන කොට ඒ නිසා මම දන්නවා... ආ.. ඒක නෙවෙයි.. අද සයුරිත් එක්ක කථා කරපු ෆිට් එකට උඹ ගානේ හවසට තේ අරන් ඕන... අර ගෙදර යනකොට තියෙන බේකරිය ගාවින්....``
´´ අපෝ...තොපි.. නං....ආ.. අන්න ... පියල් සර්.. එනවා... යමං පංතිය ඇතුළට.. ``
ක්ෂිතිජ ගයානුත් එක්ක පංතියට ගියේ වෙනදටත් වැඩියෙන් හරි සතුටින් කියලා ගයාන්ට හිතුණා.
**********
ලබන සතියේ (2011.08.29) තවත් කොටසක් කියවන්න
(සියලු හිමිකම් ඇවිරිණි.) සම්පත් ප්‍රියදර්ශන කොඩිකාර ආරච්චිගේ-2011. උපුටා ගැනීම, පිටපත් කිරීම, ඕනෑම මාධ්‍යක නැවත පළ කිරීම, මුද්‍රණය සඳහා කරුණාකර කතෘ අමතන්න. දුර. 0773-951015
PDF VERSION DOWNLOAD: http://www.mediafire.com/file/
No comments:
Post a Comment